සිපිරිගෙයක ජීවත් වූ වික්ටෝරියා ගෞරම්මා කුමරිය

එංගලන්තයේ වික්ටෝරියා රැජිණ සමග සමීප සම්බන්ධයක් තිබූ අබ්දුල් නම් ඉන්දීය පුද්ගලයෙක් ගැන කතාවක් කලකට ඉහත දී චිත්‍රපටයකට නැගුනා. වික්ටෝරියා රැජිණ සමග කිට්ටු සම්බන්ධයක් තිබූ එකම ඉන්දීය පුද්ගලයා ඔහු පමණක් නොවේ. වික්ටෝරියා රැජිණගේ සිත දිනා ගැනීමට කුඩා ඉන්දීය දැරියක් සමත් වෙනවා.

ගෞරම්මා කුමරිය ඉපදෙන්නේ ඉන්දියාව බ්‍රිතාන්‍යයේ යටත් විජිතයක් ව පැවති කාල වකවානුවේ. ඇයගේ පියා දකුණු ඉන්දියාවේ කූරග් රාජධානියේ පාලකයා වුනු චික්කා විජේරාජේන්ද්‍ර රජතුමා. ඉන්දියාව තුල ක්‍රමක්‍රමයෙන් බ්‍රිතාන්‍ය බලපෑම වැඩි වෙත්ම විජේරාජේන්ද්‍ර රජතුමා 1834 වසරේ දී බ්‍රිතාන්‍යයන්ට යටත් වනවා. එතැන් පටන් වසර කිහිපයක් දේශපාලන සිරකරුවෙක් ලෙසින් කාලය ගත කල ඔහු තම දියණියත් සමග එංගලන්තය වෙත ගමන් කරනවා.

ඒ තමන්ගේ හා තම රාජ්‍යයේ අනාගතය සම්බන්ධයෙන් නඩු විභාගයකට මුහුණ දීමට. බ්‍රිතාන්‍යයන්ගේ සිත දිනාගැනීම උදෙසා මොහු තම එකොළොස් වියැති කුඩා දියණියව ක්‍රිස්තියානි ආගමට හැරවීමට කැමැත්ත පල කරනවා. ඉන්දීයාව තුල ක්‍රිස්තියානි ආගම ප්‍රචාරය කිරීමේ දී බොහෝ ගැටලු වලට මුහුණ පෑමට බ්‍රිතාන්‍යයන් හට සිදු වීම නිසා ඉන්දීය රාජකීය පවුලකින් අයෙක් ක්‍රිස්තියානි දහමට බෞතීස්ම වීම විශේෂ මෙන්ම වාසිදායක සිදුවීමක් ලෙස ඔවුන් සිතුවා.

රජතුමා තම දියණියව ක්‍රිස්තියානි ආගමට හරවා නතර වූයේ නැත. ඔහු ඇයව බ්‍රිතාන්‍ය රාජකීය පවුලේ රැකවරණය යටතේ තැබීමට ද කැමැත්ත පල කරනවා. 

ගෞරම්මා කුමරිය වික්ටෝරියා රැජිණ හමුවන විට වයස අවුරුදු එකොළහක්. ඇයව එංගලන්තයේ දී කැන්ටර්බරි හි බිෂොප්වරයා විසින් බෞතීස්ම කරනු ලබන අතර ඇයට වික්ටෝරියා රැජිණ විසින් තම නම ද ලබාදෙනවා. ඒ අනුවා ගෞරම්මා කුමරියව එතැන් පටන් හැදින්වුනේ 'වික්ටෝරියා ගෞරම්මා කුමරිය' ලෙසිනුයි.

වික්ටෝරියා ගෞරම්මා කුමරියට බෞතීස්ම දිනයේ දී වික්ටෝරියා රැජිණ විසින් තම අත්සන සහිත බයිබලයක් ලබා දෙනු ලබනවා. පහත පින්තූරයේ ඇය අතැතිව තිබෙන්නේ එම බයිබලය යි. එමෙන්ම ගෞරම්මා කුමරියගේ මඤ්ඤා (බෞතීස්මයට දරුවාව ඉදිරිපත් කරන තැනැත්තා) ලෙස ඉදිරිපත් වූයේ වික්ටෝරියා රැජිණ යි. 

ඉන්පසු ඇයට හොද බටහිර අධ්‍යාපනයක් ලබා දීම සඳහා යොමු කිරීමට කටයුතු කරනවා. ගෞරම්මා කුමරිය වටා සිටින සමාජය ඇයට වඩා සමීප කරවීමටත් ඇයව ප්‍රසිද්ධියට පත් කිරීමටත් රැජිණ කටයුතු කරනවා. රැජිණ නිරන්තරයෙන් රාජකීය උත්සව සඳහා ඇයට ආරාධනා කළ අතර රැජිණ තම දරුවන් සමග ඇයටත් ඉඩක් වෙන් කිරීමට අමතක කරන්නේ නැහැ. ගෞරම්මා ඉන්දීය කුමරියක් වුවත් රජ මැදුර තුල දී හා ඉන් පිටත දී බ්‍රිතාන්‍ය රාජකීය පවුලේ අයෙක්ට ලැබිය යුතු සෑම සැළකිල්ලක් ම ගෞරම්මා කුමරියට ලබා දීමට රැජිණ සියලු කටයුතු සිදු කරනවා.

නමුත් මෙය සුරංගනා කතාවක එන කුමරියක් ලෙසින් අවසන් වන්නේ නැහැ. රාජකීය පවුල විසින් ගෞරම්මා කුමරිය පැළඳි ඉන්දීය ඇඳුම් ඉවතලා බ්‍රිතාන්‍ය ඇඳුම් ඇඳීමට ඇයට බල කල අතර ඉංග්‍රීසි භාෂාව කතා කිරීමට ද ඇයට බල කරන ලදි. මෙයින් ලද පීඩනය ඉතා අධික වූ නිසා ඇය කිහිප වතාවක් ම පැන යාමට ද උත්සහ කළා ය. 

ඇය වතාවක් කියා සිටියේ ඇය සේවිකාවන් සමග සේවිකාවක් මෙන් ජීවත් වීමට කැමති අතර මෙසේ රාජකීය පවුලේ අයෙක් මෙන් ජීවත් වීමට කිසිදු කැමැත්තක් නැති බවයි. 

තවත් ඉන්දීය කුමාරයෙක් වුනු දුලීප් සිං හට ගෞරම්මා කුමරියව විවාහ කර දීමට බ්‍රිතාන්‍ය රාජකීය පවුලව උවමනා විය. දුලීප් සිං ස්ව කැමැත්තෙන් ම ක්‍රිස්තියානි ආගම වැළඳගත් අයෙක් වූ අතර අදටත් බ්‍රිතාන්‍ය රාජකීය ඔටුන්නේ ඇති, ඉන්දීයාවේ මූගල් අධිරාජ්‍යයේ මොණර ඔටුන්නේ තිබූ ඉතා පැරණි ලෝක ප්‍රකට කොයිනූර් දියමන්තිය බ්‍රිතාන්‍ය රැජිණ හට ලබා දුන්නේත් දුලීප් සිං ය. ඔහුව ගෞරම්මා කුමරිය සමග විවාහ කිරීමට යෝජනා වූ නමුත් දුලීප් සිං එයට කැමති වූයේ නැත. ඔහු පැවසුවේ ඇයව ඔහුට සහෝදරියක් මෙන් දැනුන ද බිරිදක් මෙන් හැඟෙන්නේ නැති බවයි.

අවසානයේ දී ඇය විවාහ වන්නේ ලුතිනන් කර්නල් ජෝන් කැම්ප්බෙල් සමග යි. ඔහු ඇයට වඩා අවුරුදු තිහකින් වැඩිමල් වූ පුද්ගලයෙක්. ඇය ඔහුට දියණියක් ලබා දෙන අතර එවිට ගෞරම්මා කුමරියට වයස අවුරුදු විස්සකි. කලක් ගතවන විට ඇයට ක්ෂය රෝගය වැළඳෙන අතර. එම රෝගය නිසා වයස විසි තුනේ දී ඇය මියයයි. 

තමන්ගේ උපන් දේශයෙන්, භාෂාවෙන්, ඇඳුම් පැළඳුම්, නෑදෑයින් හා තම දෙමව්පියන්ගෙන් වෙන් ව එකොළොස් වියැති කුඩා දැරිය මාලිගයක් තුල ගෙව්වේ කුමරියකගේ ජීවිතයක් නොවේ. 

ඇයගේ සොහොනේ ශු. ජොහාන් 10:16 පදය මෙසේ කොටා තිබුණි;

"තවද, මේ රැළට අයිති නොවූ අන් බැටළුවෝ ද මට ඇත්තාහ. මා ඔවුන් ද ගෙන ආ යුතු ය."

එඬේරෙකුගේ කාර්යය බැටළුවන්ට ආරක්ෂාව සැපයීම යි. රැළ වර්ධනය කිරීමට ගොස් ඔවුන් සිදුකලේ කුමක් ද?